देह धारण  ।   देह पोषण । व्रताचरण ।  हें अहिंसा  ॥

देह लालन । देह पीडन । अतिक्रमण । ती हिंसा ॥

देहाचें  भाडें । लागतें थोडें । द्यावें तेवढें । ती अहिंसा ॥

पोट भरलें । धर्म्य सेविलें । वर चोचले । ती हिंसा ॥

मांसभक्षण । शाकसेवन । वृथा भाण्डण । वाद हें की तें ॥

जें जें पोषक । जें जें तारक । तें तें सात्विक । असो कांही ॥

ह्याची आवड । त्याची नावड ।  सर्वचि कोड । मीं-पणाचें ॥

ऐसें मीं-पण । हिंसा कारण । मोकळेंपण । ती अहिंसा ॥

अन्नवसन । अटळ ॠण । जगाकडून । घ्यावें लागतें ॥

मितुलें घ्यावें । तोष मानावे । आणि असावें । कृतज्ञ सदा ॥

जें कांहि घ्यावें । वर्धूनि द्यावें । उॠण व्हावें । यथाशक्ति ॥

माझी जीविका । कुणाहि एका । निमित्त दु:खा । होऊ नये ॥

जीवनहेतु । शुभं भवतु । अखण्ड ॠतु- । चक्र चालावें ॥